Tallo mangulo sa Manila squad

Pangulohan sa Sugboa­nong si Mark Jayven Tallo ang Manila Chooks squad nga mokombati sa 2023 Chooks-to-Go FIBA 3x3 World Tour Cebu Masters nga sugdan karong Septiyemre 23, 2023 sa SM Seaside City ning Dakbayan sa Sugbo.

Kauban ni Tallo sa team mao sila si kanhi University of Cebu foreign student-athlete Tosh Sesay, Marcus Hammonds, ug Marquez Let­cher-Ellis.

Si Tallo, kinsa produkto sa Southwestern University (SWU) Phinma Cobras, kumbensido nga ang ilang pu­wersa makakombati og insakto batok sa langyaw nilang mga kaparang.

Moabot sa 14 ka teams ang magtigi sa kompetisyon nga gipangulohan sa Ub Huishan sa Serbia, Amsterdam HiPRO sa Netherlands, ug Vienna sa Austria.

Naa sa Serbia ang top three 3-on-3 players sa kalibutan nga sila si Strahinja Stojacic, Dejan Mastorovic, ug Marko Brankovic.

Ang kampyon sa torneyo makadawat og $40,000 samtang ang runner-up makadala og $30,000. / JNP / ESL