KUTOB ra sa ikalimang round si Carlos Tamara, Columbian nga boksidor, sa ilang away ugma sa gabii sa “Pinoy Pride 2: Best of the Best” sa Cebu City Waterfront Hotel and Casino.
Kini ang panganti sa Sugbuanong boksidor nga si Milan Melindo agi og pagtubag sa unang komentaryo sa coach ni Tamara nga si Edgar Sanchez nga dakong sayop ang pagpakigsakbang sa iyang boksidor.
Dihang gikuhaan og reaksyon si Melindo sa mga sportswriter atol sa press conference kagahapon sa Cebu City Waterfront Hotel and Casino, kini nagkanayon nga di lang estoryahon kon dili, kini buhaton.
“Don’t say it, just do it,” dason niya.
Dugang ni Melindo nga sa training nga ilang gihimo ubos sa iyang coach nga si Edito Villamor, masaligon siya nga iyang pakamangon si Tamara sud sa lima nga round.
Kahinumdoman nga gipakagamay ni Sanchez ang Pilipino nga boksingero nga si Melindo atol sa ilang press conference sa miaging adlaw.
“Why fight Tamara? I personally won’t fight him. He is ready to give Milan his first defeat on Saturday,” pulong ni Sanchez.
Dihang gisukna sa mga tigbalita, si Sanchez nagkanayon nga kon adunay knockout nga mahitabo sa iyang batos ila kining dawaton apan, masaligon siya nga si Tamara maoy modaug gumikan sa kasubsob usab sa ilang pag-ensayo.
Si Sanchez nihulagway nga ang away sa ‘Pinoy Pride 2: Best of the Best’ usa kini ka lisod nga away alang sa ilang kampo sanglit usa usab ka ngilngil ug walay pilde sa iyang record si Melindo nga dunay 22-0-07 win-loss-knockouts ug si Tamara dunay 21-5-15 nga baraha.
Si Milendo nipasupot pa ug estorya nga ugmang sa gabie matilawan sa Columbian ang kabangis sa Pilipino ibabaw sa ring.
“Matitikman din niya ang Pinoy,” pabuhagay sa way pildeng boksidor.
Atol sa samang press conference, wala na hinuon mohirit ang trainer ni Tamara ug nipabuhagay pa nga gihigugma sa iyang batos ang Pilipinas ug iyang gihulagway nga ang mga Pilipino subra ka maamiguhon base sa iyang nakita.
“ Tamara loves the Philippines and people is so friendly,” hirit ni Sanchez.
Si Edito Villamor, ang coach ni Melindo, masaligon gyud nga ma knockout sa iyang batos si Tamara sa 5 round kon matuman niini ang ilang game plan.
Laing mga Pilipino ang moduwa sa undercard sa ‘Pinoy Pride 2: Best of the Best’ sa ALA promotions ug ABS-CBN Sports mao si Melvin Gumban batok JR Salvador, Rey Melligen batok Junel Gadapan, Dodie Boy Peñalosa Jr. batok Jomar Torreon.
Randy Suico batok Arnel Tinampay, Florante Condes batok Kenichi Horikawa sa Kyoto Japan, Rocky Fuentes batok Inthanon Sithchamuang sa Bankok Thailand .
Samtang sa Main event, Milan Melindo versus Carlos Tamara sa Columbia sulod sa 10 ka rounds.
Samtang, ang weigh-in sa mga boksidor ipahigayon karon sa SM Cebu Entertainment Center. (PAC)