Sa wala damhang hitabo, ang USA Basketball team nasugamak og makapakurat nga kapildihan gikan sa mga kamot sa Nigeria, 90-87, kagahapon, Hulyo 11, 2021 (RP time) sa Las Vegas, Nevada sa pagsugod sa ilang hugot nga preparasyon alang sa Tokyo Olympics.
Ang Nigerians, nga gipangulohan sa dili inilang mga magduduwa sa National Basketball Association (NBA), nakakita og gamayng lutsanan aron buntogon ang Team USA nga gilangkuban og NBA All-Stars.
“We just wanted to compete,” matod ni Gabe Nnamdi sa Nigeria kinsa nakaduwa sa Miami Heat.
Sa wala pa sugdi ang duwa, ang US aduna nay rekord nga 11 ka mga pildi sa major international tournaments - Olympics ug World Cup - sukad nga gibituonan ang team og NBA players nga nagsugod niadtong 1992 nga mao ang Dream Team.
Apan ning 11, wala gyu’y team sa Africa ang nga nakapildi sa Amerika.
Si US head coach Gregg Popovich midayeg sa gipakitang labok sa Nigeria batok sa iyang team.
Si Nnamdi mipaksit og 21 puntos alang sa Nigeria, nga milupig sa US sa initsahay sa three-point area.
Si Kevin Durant mitali og 17 puntos, 15 ang nadugang ni Jayson Tatum, ug 14 gikan usab ni Damian Lillard. (JBM)