"THERE'S no place like home."
Mao kini ang tipik sa pamahayag ni retired ug kanhi World Boxing Council (WBC) world flyweight champion Rodel "Batang Mandaue" Mayol kinsa taodtaod na atoa nagbasehan sa Amerika.
Si Mayol, lumad nga taga Barangay Alang-Alang, dakbayan sa Mandaue maoy mahimong temporaryong pinuy-anan sa pipila ka mga Sugboanon o mga Pinoyng boksidor kinsa manimpalad sa ilang karera didto sa Estados Unidos.
Modagan na og 12 ka tuig siyang nanimuyo sa Oakwood Blvd., Los Angeles, California nga dili ra usab halayo sa Wild Card Gym sa inilang boxing trainer nga si Freddie Roach.
"Kung wala silay mapuy-an, diri lang sa sila sa amoa hangtod or gusto sa ilang manager," matod sa 38 anyos nga Mayol kansang pagpamoksing nagsugod ubos sa Flores Boxing Club nga gidumala ni anghing Noy Pacing Flores ug sa anak niini nga si Brix Flores.
Gitumbok ni Mayol sila si Jhack Tepora, Casimero, Mike Plania, Ricky Dulay, Romero Duno, Raymart Gabalo, Marlon Tapales, Ernesto Saulong, Al Rivera ug John Moralde maoy pipila sa mga nakapuyo sa ilaha.
Sa sayong bahin sa iyang career, dinuyogan sa iyang hingutas nga paningkamot, daw og sa gipadpad sa maayong kapalaran ang dagan sa iyang kinabuhi nga nagsubay sa dalan sa pagpamoksing.
Daghan man tuod ang mga pagsuway nga iyang naagi-an, apan pilit kini niyang kining gilatas aron lang pagkab-ot sa iyang mga panglantaw ug damgo.
Human sa mga adlaw sa iyang pagka-amateur fighter, misaka siya sa pagka-professional boxer ug ning higayona ubos sa pagdumala sa Ala Boxing Gym.
Nahitapon usab siya sa Terry Carter Stable sa Lilo-an ug hangtod nahitaak siya didto sa Japan sulod sa pipila ka mga katuigan Apan misugod og kaamag ang iyang dalan sa dihang nahisulod na siya sa kampo ni Filipino boxing icon Manny Pacquiao. Nakampiyon niadtong tuig 2019 sa dihang iyang gipakaging ug gi-knockout si Edgar Sosa sa Mexico sulod lang sa duha ka round.
Nadepensaan ni Mayol ang titulo batok ni Omar Nino Romero human matabla ang ilang away apan napildi siya sa ilang rematch sa 2010.
Human sa kapildihan midagan pa og daghang katuigan nga namupo og mga kadaugan ang Batang Mandaue, ug gani sa lima ka sunodsunod niyang daog, duha niini iyang gipaundang.
Pero sa tuig 2012, nakabaton og laing oportunidad si Mayol nga makaaway alang sa International Boxing Federation (IBF) superflyweight title, apan wala modap-ig kaniya ang kahigayonan sa dihang na-knockout siya ni Juan Carlos Sanchez Jr. sa ikasiyam ka round, nga maoy nagtuldok sa iyang boxing career.
Apan dili hingpit ang pagbiya niya sa boxing sanglit nahimo na man usab siyang trainer sa pipila ka mga batan-ong boksidor diin iyang gipasawo ang iyang kahibawo.
Hinayhinay usab siyang nakaumol og mga boksidor nga nakadibuho na usab og pangalan.
"2007 naabot ko sa America as boxer, then 3 years after ni file ko ug green card then last year nahimo nakong American citizen," padayog ni Mayor sa online interview sa Superbalita. "So 12 years nako sa America.
Gawas sa iyang pagka boxing trainer, wa usab usiki ni Mayol ang iyang mga bakanting oras. Siya misulod isip usa ka caregiver nga dili ra pod halayo sa iyang gipuy-an.
"Nag caregiver ko pag walay boxing. So okey man gihapon ang kita," dugang ni Mayol. Apan ning kasamtangan nga gihudlat sa makalilisang nga virus ang tibuok kalibutan, wala nay mga gym nga ilang kapraktisan.
Daghan mga buhatan nga misira ug ang kahadlok, kalisang ug kabalaka maoy mihulip sa masanagon ug masaaron nga palibot. "Sarado ang gym, bar, uban mga business. Naa restaurants pero take out lang. Caregiver naa, grocery stores, daycare open. So far, wala pa lockdown, pero mora ug hapit na," daklit ni Mayol. "Mingaw na gyud."
Apan bisan pa niini, positibo si Mayol nga mahunong ra kining tanang pagsuway.
Ug sa higayon nga mahibalik na ang tanan ngadto sa normal nga kahimtang sa panginabuhi, ipadayon na usab ni Mayol ang naandan na niyang bulohaton didto sa Amerika.
Dili niya masinati ang kalisod sa panginabuhi kay aduna man siyay igong makita alang sa iyang pamilya.
Apan taliwala niining tanan nga iyang natagamtam didto sa Amerika, si Mayol nagkanayon, nga sa iya unyang pagretiro sa trabaho, mobalik ra gihapon siya sa iyang yutang natawhan - ang nasudnong Pilipinhon.
"There's no place like home," ingon pa niya. (JBM)