Nakabawos ang manghod sa maguwang.
Mao kini ang senaryo sa panag-abot ni Kiefer Ravena ug sa igsuon niini nga si Thirdy Ravena sa B. League sa Japan.
Human mapildi sa ilang panagsangka sa miaging adlaw, ang San-En Neophoenix, ang team ni Thirdy, mipukan sa team ni Kiefer nga Shiga Lakerstars, 101-96, sa duwa nga niagi pa og overtime sa Ukaruchan Arena.
Nabiyaan na unta og 18 puntos ang NeoPhoenix apan nakakita kini og agianan aron mahatod ngadto sa overtime ang panagsangka.
Ang 7-0 nga rally nga gipahagsa nga giduslitan ni Thirdy maoy nagyawe aron sakmiton ang 94-87 nga labaw, 2:57 ang nahabilin sa oras.
Si Thirdy mikadlit og 21 puntos sa maong kadaugan. Gawas niini, nakalangkat pa gyud siya og pito ka rebounds ug lima ka assists alang sa unang kadaugan sa NeoPhoenix. (JBM)