Adunay posibilidad nga ikaharong ni World Boxing Organization (WBO) Interim super welterweight champion Australian Tim Tszyu ang bag-ong undisputed welterweight champion nga si American Terence Crawford alang sa usa ka megafight sa hinapos nga bahin ning tuig 2023.
Si Tszyu mahimo nang hingpit nga world super welterweight champion karong Septiyembre 30, 2023 human gianunsyo sa WBO nga tangtangan og bakos ang kasamtangang regular champion nga si American Jermell Charlo gumikan kay mokampanya na kini sa mas bug-at nga timbang.
Kon mahimo nang hingpit nga world champion si Tszyu, hayan dako ang poruhan nga siya maoy sunod nga kontrahon ni Crawford, kinsa posibleng mosaka na sa super welterweight division.
Gipadayag ni Tszyu ang iyang kaandam nga makigharong ni Crawford apan iyang gitataw nga si Errol Spence Jr. unta ang iyang gustong kontrahon gumikan kay aduna sila’y personal nga panagbikil.
Si Spence maoy gilupig ni Crawford ning bag-uhay lang aron ankunon ang undisputed welterweight title.
“If he Crawford wants to come up, I give Crawford respect,” matod ni Tszyu.
“But I want Spence because we’ve got a bit of bad blood. I want a little itch to wake up to, I want to take someone’s head off.” / ESL