Miamag og maayo ang paglaom sa Tubu Moalboal team-Tubu Master Services and Construction Supply nga makasulod sa semifinals round sa 1st Mayor Fritz Lastimoso Inter-City/town basketball tournament sa lungsod sa Alcantara, Cebu.
Kini human nga gilubong sa Tubu Master ang Ronda, 100-119, Sabado sa gabii aron sakmiton ang ilang ikaduhang kadaugan sulod sa upat ka duwa.
Si Allen Gako maoy nahimong mahait nga hinagiban sa Moalboal human kini mipauwan og 10 ka tres sa iyang 36 puntos sa kagabhion.
Sa bisan nga asa nga angulo, ang 18-anyos nga sakop sa University of Cebu Baby Webmasters way panagana nga mipabuhagay sa iyang itsa sa three-point area.
“Ganahan lang gyud ko moitsa ilabi na og bakante. Akong hunahuna nga masud man gyud,” matod ni Gako.
Mitimang kaniya sa opensa ang beteranong si Emmanuel Calo nga may 22 puntos ug Mark Jayven Tallo nga may 20 puntos.
Aron pagpabukad sa ilang tsansa sa sunod round, kinahanglan dag-on sa Moalboal ang ilang duwa batok sa defending champion Argao sa Lunes sa pagtiklop sa elimination round nga mao unyay magdeterminar kon kinsa ang madala sa cross-over semis series.
“Bintaha tag gamay kon dunay multiple tie kay dakodako tag labaw,” matod sa team owner sa Tubu Master nga si Rodolfo Borja.
Ubos sa format, kon dunay multiple tie sa standing human sa elimination round, ang quotient system maoy modeterminar sa semis qualifiers.
Human makaposte og 32-23 nga labaw sa first quarter, ang Tubu Master nakabaton og dakong hulga sa dihang nalabwan kini, 39-36, sa second quarter.
Ang 16-4 nga giduslitan sa tres ni PBA player Calvin Oftana maoy nakapahilom sa mga dumadapig sa Moalboal.
Apan wa ra usab gilayon kini magdugay og ang lusot ni Emmanuel Calo nga gisundan sa duha ka sunodsunod nga tres ni Gako maoy naghatag og agianan aron ipadayon ang ilang dominasyon.
Sa pagsira sa third quarter, mibukad man tuod ang ilang labaw ngadto sa 92-74 apan napahakan kinig dako, 103-91, sa katapusang 5:44 sa fourth quarter.
Hinuon kadto mao ang katapusang hunat nga nahimo sa Ronda ug ang panaghugpong nila ni Gayford Rodriguez, Prince Canete ug Junrey Omagac maoy naghingpit sa ilang dominasyon.
Si Rodriguez ug Omagac mitapos sa duwa nga may 11 puntos matag usa kanila samtang si Cañete nakatampo og sayis puntos gawas sa iyang pipila ka rebounds.
Ang Tubu Master team ubos sa pagdumala ni multi-titled coach Chelito Caro.