Gipatapsingan sa Tuburan 360 Coffee ang K&L Marketing-Naga City, 110-108, aron irehistro ang ikaduha nilang sunodsunod nga kadaugan sa samang gidaghanon nga mga duwa sa 2023 Balamban Fiesta Cup Inter-Commercial League ning Miyerkules sa gabii, Septiyembre 13, 2023, sa Mayor Exasperanza Binghay Memorial Sports Complex sa lungsod sa Balamban, Cebu.
Ang kadaugan gipangulohan ni Pacsoy Oropiano pinaagi sa iyang 22 puntos sa 9-of-13 shooting, niamot og 18 puntos si Melvin Butuan samtang nihatag og 14 puntos si Jiesel Tarrosa.
Kon buot hunahunaon, ang usa sa mga pambato sa K&L nga si Jayson Balabag mao ang labing maayong nakaduwa ning sangkaa ug nirehistro kini og 46 puntos.
Apan nausik ang tanang paningkamot ni Balabag gumikan sa kapildihan.
Gikan sa 18 puntos nga biya, ang K&L hinayhinay nga ninggukod hangtod nga nakasikit sila pagbalik apan nahikawan na sila sa oras.
Sa laing duwa, gipangbuntog sa AC Troopers/Eversure ang Good Shepherd Toledo City, 85-79.
Sa kadaugan, napahugtan sa AC Troopers ang ilang paggunit sa solong liderato bitbit ang 3-0 nga rekord.
Puntos matag usa:
1st game:
AC Troopers (84) - Pepito 20, Delator 15, Bonganciso 14, Gonzaga 10, Cabahug 9, Juntilla 8, Lao 4, Ferraren 3, Suano 2.
Good Shepherd (79) - Dela Cerna 23, Gabisan 22, Tangkay 15, Berame 6, Aguirre 3, Lacang-lacang 3, Bubuli 2.
2nd game:
Tuburan (110) - Oropiano 22, Butuan 18, Tamosa 14, Viajar 11, Parilla 9, Belande 7, Jusay 6, Yuson 6, Diamante 6, Brillo 5, Fin 4, Amistoso 2.
K & L Marketing (108) - Balabag 46, Ruedas 15, AJ Sacayan 14, Ortega 14, Ygay 12, Codilla 5, Flores 2. / ESL