Gipangbuntog sa Tuburan 360 Coffee ug Good Shepherd Toledo City ang ilang tagsa-tagsa ka kontra sa duha ka mga tinagakay nga mga kombati sa 2023 Balamban Fiesta Cup Inter-Commercial Basketball League niadtong Lunes sa gabii, Septiyembre 18, 2023, sa Mayor Exasperanza Binghay Memorial Sports Complex sa lungsod sa Balamban, Cebu.
Gipangpukan sa Tuburan 360 Coffee ang K&L Marketing-Naga City, 95-88, sa premirong duwa samtang gipangmakmak sa Good Shepherd ang EGS, 89-71, sa main game.
Sa ilang kadaugan, ang Tuburan 360 Coffee ug Good Shepherd mao ang mag-ilog sa katapusang puwesto sa finals samtang kutob na lang sa ikatulong puwesto ang puwedeng makuha sa K&L Marketing ug EGS.
Ang premirong luna sa finals naangkon nang daan sa AC Troopers/Eversure human nila naharos pagdaog ang upat nila ka mga tahas sa elimination round.
Gikan sa sinugdanan, ang Tuburan Coffee mao na ang nagkontrolar batok sa K&L Marketing ug nakaposte pa sila og 56-38 nga labaw halftime.
Nakaduol pagbalik ang K&L Marketing, 78-84, sa 4th quarter apan wala nila nakomplero ang ilang pagbangon.
Ang Tuburan Coffee gipangulohan nila ni Mike Parilla, Jiesel Tarrosa ug Pacsoy Oropiano pinaagi sa ilang 14 puntos matag usa samtang nidugang og 10 puntos si Jimpaul Amistoso.
Nangulo sa K&L Marketing mao si Jayson Balabag pinaagi sa iyang 32 puntos, nihatag og 19 puntos si Ian Ortega samtang nitampo og 14 puntos si Michael Diaz.
Sa laing duwa, naglabaw pa unta ang EGS batok sa Good Shepherd human sa 1st quarter, 23-19.
Apan sa pagsugod sa 3rd quarter, hingpit nang nabalik ang dagan sa kombati.
Ang Good Shepherd gipangulohan ni Joshua Dela Cerna pinaagi sa iyang 25 puntos, nitunol og 18 puntos si Rhino Berame samtang niamot og 15 puntos si ex-PBA Herkules Tangkay.
Samtang ang EGS gipangulohan ni ex-PBA Paul Desiderio pinaagi sa iyang 29 puntos samtang nihatag og 12 puntos si Richmond Bersabal. (ESL)