Moabot sa 40 ka elite student-athletes gikan sa University of Tennessee sa Knoxville, USA ang nibisita sa Pilipinas sulod sa 10 ka mga adlaw sa tinguha nga makat-on kon giunsa paggamit ang sports aron makakablit sa komunidad ug makahatag og potensyal nga mga oportunidad.
Ang maong student-athletes ubos sa liderato sa VOLeaders Academy, kansang misyon mao ang pag-umol og student-athlete leaders nga makahatag og positibong kausaban sa katilingban pinaagi sa sports.
Ang VOLeaders usa ka academic-based program nga nagtudlo og leadership development ug sport for change work.
Nakabisita na ang grupo sa unom ka mga nasod gikan niadtong 2016.
Niadto sila sa Brazil niadtong 2016, Vietnam niadtong 2017, Ecuador niadtong 2018, Rwanda niadtong 2019 ug 2022, ug hasta sa Benize niadtong 2021.
Ning tuig 2023, ang mga lugar sa Pilipinas nga ilang gibisita mao ang Manila, Coron, ug Cebu.
Niini lang Hulyo 11, 2023, niduaw sila sa Cebu Doc University sa North Reclamation Area sa Mandaue City aron makat-on kabahin sa wheelchair basketball ug sitting volleyball nga giduwa sa Persons with Disabilities (PWDs) gikan sa Philippine Accessible Disability Services Inc. (Pads). (HIC)