Sa nag-unang duha ka mga duwa sa Orlando Magic sa 2023 National Basketball Association (NBA) Summer League, igo ra nagpasinaw sa bangko ang batan-ong Pinoy nga higante nga si Kai Sotto.
Tungod niini, nihanap ang poruhan nga makaduwa ang 7'3" ug 21 anyos nga basketbolista sa Gilas Pilipinas alang sa umaabot nga FIBA Basketball World Cup diin co-host ang Pilipinas kauban ang Japan ug Indonesia.
Nagkanayon si Sotto nga gitambagan siya sa iyang agent sa Amerika nga magtutok lang una siya sa iyang ambisyon nga mahimong labing unang lumad nga Pinoy nga makaduwa sa NBA.
Gipasabot ni Sotto nga ganahan unta siyang moduwa sa Gilas Pilipinas alang sa FIBA Basketball World Cup apan ning puntoha, prayoridad niya ang makakulit og kasaysayan alang sa Philippine basketball.
"I don't know yet. I mean, I want to but right now I'm just focused on the Summer League. That's what everybody's been telling me. My agent's been telling me, just focus on this," matod ni Sotto nga napatik sa Spin.ph.
Taliwala sa kasamtangan niyang kasinatian sa Summer League, nagpabiling positibo ang hunahuna ni Sotto.
"I'm a professional. I just focus on things I can control. Obviously, I can control myself, my emotions. Just gotta stay ready," dugang ni Sotto.
"I mean as a professional you don't get the chance to play in every game. Just gotta stay healthy, keep the positive mindset, that positive attitude and we'll all be good."
Si Magic coach Dylan Murphy nihatag og katin-awan kabahin sa paglista niya ni Sotto isip Did Not Play-Coach' Decision (DNP-CD) sa nag-una nilang duha ka mga duwa.
Gipasabot ni Dylan nga ang tanan niyang gihimo nakaplano nang daan.
Hinuon gipaneguro ni Dylan nga ang tanan nilang mga sakop sa Summer League mahatagan ra og kahigayunan nga makaduwa.
"Yeah, you know, it's just, we kind of set the plan before the game. But everyone will get their chance," pasabot ni Dylan.
Ning Huwebes sa buntag, Hulyo 13, 2023 (PH time), sagubangon sa Magic ang ikatulo nilang tahas sa Summer League batok sa New York Knicks.
Makaduwa na kaha si Sotto? (ESL)