Wilder wala pa'y planong moretiro

WALA pa nasulod sa alimpatakan ni Deontay Wilder ang pagretiro taliwala sa iyang 11th round knockout nga kapildihan batok kang Tyson Fury sa ilang World Boxing Council (WBC) heavyweight title bout trilogy niadtong Dominggo, Oktubre 10, 2021 (RP time) sa Las Vegas, USA.

Ang kapildihan maoy ikaduhang sunodsunod nga higayon nga na-knockout si Wilder ni Fury human nagtabla ang ilang premirong away.

Sa duha niya ka mga kapildihan batok ni Fury, sulod sa lima ka mga higayon nga na-knockdown si Wilder hinungdan nga gituohang moretiro na kini.

Apan gitataw sa trainer ni Wilder nga si Malik Scott, wala’y plano ang iyang batos nga mohunong na sa pag-away.

“Deontay has set his family financially secure so he doesn’t have to fight to make a living,” pasabot ni Scott sa interbyu sa IFL TV nga napatik sa boxingscene.com.

“But retiring is not in his plans at all and not something we’ve discussed.”

Mismong si Scott, dili pa gustong moretiro si Wilder gumikan kay nasayod siyang aduna pa kini saktong ikabuga.

“He will be back in any form he wants to be,” asoy ni Scott. “He’s a big-time fighter and he doesn’t belong down there with the other guys, he needs to be in high-level fights and main events.”

Si Wilder, 35, naggunit og 42-2-1, 41KOs nga rekord. (ESL)