Nipadayag ang pipila ka representante sa mga utility company sa dakbayan sa Mandaue nga ang ‘overloading’ mahimong magdala og mas grabeng katalagman tungod sa paggamit sa usa ka poste alang sa wiring ug cable installations.
Sila namahayag taliwala sa nag-ung-ong nga pagpatuman sa Single Pole Policy Ordinance, diin ang Mandaue City Government nihimo og public consultation ug workshop kabahin sa inisyatiba, nga gipahigayon sa Bai Hotel Cebu sa North Reclamation Area sa Mandaue City, Huwebes, Septiyembre 21, 2023.
Si Airam Detablan, Operations and Maintenance Lead for Visayas sa DITO Telecommunity, niingon nga samtang makadaginot sila sa pag-instalar og dugang mga poste alang sa ilang koneksyon sa pagbutang niini sa usa ka dominanteng poste, apan di kini maayo.
Siya nipasabot nga hinungdan kini sa posible'ng pagkahugno sa poste nga mosangpot sa posibleng mga aksidente sa kadalanan ug overloading sa koneksyon nga hinungdan sa sunog ug pagkawala sa kuryente.
Ang mga kompaniya sa telco ningpadayag usab og kabalaka bahin sa kahasol sa pagbalhin sa mga kable gikan sa usa ka lugar ngadto sa lain, matod pa, ang usa ka gamay nga cable wire mahimong motimbang og labing menos usa ka kilo ug ang proseso sa pagbalhin niini budlay kaayo.
Ang polisiya nagsugyot nga wagtangon ang tanang clustered pole sa mga sidewalk, daplin sa dalan, ug bisan unsa pang publikong lugar, nga magpabilin lang ang poste nga gipanag-iya sa dominanteng utility company nga adunay labing daghang connecting nga poste ug kustomer nga giserbisyuhan, sama sa telecommunications companies.
Samtang, alang sa mga lugar nga walay poste nga gipanag-iya sa dominanteng utility company, ang ordinansa magtugot nga mapabilin ang clustered pole nga adunay labing daghang koneksyon ug ang mga kustomer makadawat sa tanang cable connections.
Ang mga exempted sa One Pole Policy naglakip sa mga lugar diin ang kasamtangan nga poste dili maka-accommodate sa dugang nga electrical equipment installation ug ang ilang mga attachment lisod ibalhin ug kon ang poste mao ang usa ka sub-transmission pole nga nagdala sa taas nga boltahe sa kuryente.
Ang mga non-compliant utility companies mobayad og multa nga P300,000 matag poste matag adlaw ug makadawat og warning letter gikan sa Technical Infrastructure Committee (TIC) sa dakbayan.
PAGHAWAN
Sa linaing pakighinabi, si Mandaue City Mayor Jonas Cortes niingon nga nisamot ang problema sa Siyudad sa nagbitay nga mga wire tabok sa mga dagkong dalan human ang supertyphoon Odette (Rai) niigo sa Metro Cebu, apil na ang Mandaue.
Si Cortes niingon nga nagsugod sila sa clearing operations sa telcos ug ubang stakeholders pagkahuman apan nagpadayon kini nga problema.
Atol sa diskusyon, gitumbok sa pipila ka telcos ang komplikado ug delikado nga proseso sa pagbulag sa patay ug aktibo nga wires nga nakababag sa pagpadali sa ilang clearing operations. / HIC