Surpresang naangkon sa mga Pinoy nga sila si James Aranas ug Johann Chua ang kampyunato sa World Cup of Pool 9-ball doubles pinaagi sa pagbuntog sa panagpares nila ni Joshua Filler ug Moritz Neuhausen sa Germany, 11-7, sa finals ning Lunes sa buntag, Hulyo 3, 2023 (PH time) sa Pazo de Feiras e Congresos de Lugo, Spain.
Ning-asdang sila si Aranas ug Chua sa torneyo nga dili rated apan sunodsunod nilang gipakuratan ang ilang mga kaatbang gikan sa Spain, Chinese Taipei, Austria dayon ang Germany.
Nahatag nila ni Aranas ug Chua ang ikaupat nga kampyunato sa Pilipinas ning maong prestihiyusong kompetisyon, labing daghan nga nakuha sa usa ka nasod sa kasaysayan sa torneyo.
Nagkanayon si Chua nga sulod na sab sa 13 ka mga tuig nga nag-uban sila ni Aranas ug dugay na nilang pangandoy nga mahimong world champions.
Sa kalampusan, nakabulsa sila si Chua ug Aranas og $60,000 o P3.3 million.
Ang Filipino billiard legends nga sila si Efren "Bata" Reyes ug Francisco "Django" Bustamante mao ang ningkampyon sa labing unang edisyon ning maong torneyo niadtong 2006.
Paglabay sa duha ka mga tuig, mikampyon na sab sila si Reyes ug Bustamante.
Ang panagpares nila ni Dennis Orcollo ug Lee Van Corteza mao ang ningtunol sa ikatulong korona sa Pilipinas ning maong torneyo niadtong 2013. (ESL)