Gipahayag ni Israeli Prime Minister Benjamin Netanyahu sa usa ka video-taped statement niadtong Dominggo, Mayo 31, 2026, nga iyang gimandoan ang militar nga mas palapdan pa ang kontrol niini sa mga dapit sa Lebanon nga gihuptan sa Hezbollah.
Ang maong kamandoan giluwat human nailog sa mga sundalo sa Israel ang Beaufort Ridge, lakip na ang estratehikong kastilyo (castle) sa tumoy niini, didto sa habagatang bahin sa Lebanon. Ang maong dapit unahan na sa "security zone" nga gihuptan sa Israel sukad napatuman ang ceasefire niadtong tunga-tunga sa Abril.
Matod ni Netanyahu, human sa iyang direktiba nga palapdan ang operasyon sa Lebanon, gitabok sa mga pwersa sa Israel ang Litani River ug giilog ang mga importanteng dapit, lakip na ang Beaufort.
Dugang pa niya, ang tumong karon mao ang pagpalig-on sa ilang kontrol sa mga nailog nga posisyon, ug gihulagway niya ang pag-ilog sa Beaufort isip "usa ka dramatiko nga yugto ug dakong kausaban sa palisiya nga atong gipangulohan."
Gipahayag sa prime minister sa Israel nga sukad nagsugod ang gubat sa nagkadaiyang natad niadtong Oktubre 2023, napatay na sa Israel ang 8,000 ka mga militante sa Hezbollah, lakip na ang 700 niini sa niaging buwan lamang. / Xinhua
