Jaguars, Cobras nabunyagan og kadaugan sa Sinulog Cup

Gisugdan sa University of San Jose-Recoletos (USJ-R) Jaguars ug Southwestern University-Phinma (SWU) Cobras ang ilang kampanya sa qualifying round sa Sinulog Cup 2024 Basketball Tournament pinaagi sa pagposte og dagkong kadaugan batok sa lainlaing kontra niadtong Martes sa gabii, Enero 16, 2024, sa Cebu City Sports Institute.

Ang Jaguars ninglampornas sa University of San Carlos (USC) Warriors, 84-66, samtang gipangpahit sa Cobras ang University of Southern Philippines Foundation (USPF) Panthers, 66-57.

Nagbangis ang Jaguars sa 3rd quarter diin nimugna sila og 29-8 run nga naghatag kanila og 71-37 nga labaw ug wala na nakabangon ang Warriors gikan ning maong pagkalubong.

Lima ka mga magduduwa sa Jaguars ang nitali og dobleng numero nga puntos pinangulohan ni Jay Deiparine, kinsa nirehistro og 17.