Nangabot na sa Dakbayan sa Sugbo ang Japanese boxers nga mopakita’g aksyon sa Fist of Fury VIII: Philippines vs. Japan, nga ipahigayon karong Sabado, Agusto 16, 2025, sa Sky Hall sa SM Seaside City.
Ang grupo, nga gipangulohan ni Haroki Miyamoto, nakataak sa Mactan- Cebu International Airport kagahapon sa kadlawon, Huwebes, Agusto 14.
Kauban ni Miyamoto ang iyang mga kababayan nga amateur boxers nga makig-away og Pinoy nga mga kontra sa dili pa opisyal sugdan ang gikahinamang boxing card, nga gipasiugdahan sa Chao Sy International Boxing Promotions.
Si Miyamoto moaway sa main event sa promosyon diin ikaharong niya si Junibert Bantay sa Chao Sy Boxing Stable alang sa inilugay sa bakanting World Boxing Foundation (WBF) Silver Youth title.
Ang promoter nga si Lorenzo ‘Chao” Sy nagkanayon nga grabeng binukbokay ang seguradong masaksihan sa promosyon.
“Bisan kining amateur fights, binukbokay gyud ni’g maayo. Tanang mga away ani atong promotion nindot gyud ni nga mga away. Sumbagay gyud ni,” matod ni Sy.
“First time ni nga naay amateur boxers sa laing nasod nga moaway dinhi.”
Gawas sa engkuwentro nila ni Miyamoto ug Bantay, aduna pa’y laing lima ka professional fights ang masaksihan.
Ang amateur fights sugdan sa alas 4:00 sa hapon samtang mosunod ang professional fights sa alas 6:00 sa gabii.
Sa laing bahin, ipahigayon karong Biyernes sa buntag, Agusto 15, ang official weigh-in sa promosyon. / ESL