Nagpakita og saktong abilidad si Filipino Junibert Bantay sa iyang pagposte og dominanteng unanimous decision nga kadaogan batok sa mas taas nga si Japanese Haroki Miyamoto sa main event sa Fist of Fury VIII: Philippines vs. Japan boxing promotion niadtong Sabado sa gabii, Agusto 16, 2025, sa Sky Hall sa SM Seaside City sa Dakbayan sa Sugbo.
Sa kadaogan, naangkon sa sakop sa Chao Sy Boxing Stable ang bakanteng World Boxing Foundation (WBF) Silver Youth super featherweight title. Si Bantay, kinsa nisaka sa 9-0, 1KO nga rekord, nanghawod sa scorecards sa tulo ka judges, 79-73, 78-74, ug 78-74.
“Una sa tanan, nagpasalamat ko sa akong manager Lorenzo “Chao” Sy nga iya kong gitagaan og opportunity nga makaduwa ko og ing-ani ka dako nga event,” matod sa 25 anyos nga si Bantay. “Ako gyud ni gihaguan ug ako gyud ni nga pangandoy nga makaduwa ko og championship.”
Si Bantay nisaka og timbang gikan sa featherweight (126 lbs,) ngadto sa super featherweight (130 lbs) aron makuha lang kining maong oportunidad.
“Kanang bataa, ako gyud na nga gipreparahan siya. Kining duwaa, timbang pa gyud ni sa katong Hapon. Ingon ko nga duwa lang ani para makita gyud nako imong abilidad. Ingon siya, wala’y problema sir, ato ning duwaan,” matod ni Sy.
Nagkanayon si Sy, kinsa maoy big boss sa nagpasiugda ning maong boxing card nga mao Chao Sy International Boxing Promotions, kuntento kaayo siya sa gipakitang away ni Bantay.
Gipasabot ni Sy nga maghan-ay siya og programa nga mag-agak ni Bantay ngadto sa world title fight sa umaabot.
“Basig maka-world champion na ta,” panghinaot ni Sy.
Sa kinatibuk-ang away, tataw nga naglisod si Miyamoto ug kanunay lang siyang maigo sa counter punches ni Bantay kon moaksyon siya sa pag-ataki.
Si Miyamoto, kinsa adunay impresibong record sa amateur rank, nahagsa sa 2-1, 2 KOs nga rekord isip professional boxer.
Sa top supporting bout, niresulta sa panagtabla ang Philippine Boxing Federation (PBF) fly weight title bout tali nila ni Jemuel Aranas sa Chao Sy stable ug Japanese Kiyoto Narukami.
Sa laing title fight, naangkon ni Kenneth Albino sa Manila ang Philippine Youth bantamweight belt human niya gilupig si Vicente Unidos sa Chao Sy stable pinaagi sa 4th round TKO.
Wala na nipadayon og away si Unidos pagsugod sa 4th round gumikan kay napiang ang iyang wa nga bukton nga iyang nasinati sa hinapos nga bahin sa 3rd round.
Sa laing mga away, ningdaog sila si Joferson Trazo batok Marlon Alejandro (TKO 6), Brian Bustrillo batok Justine Lumanao (TKO 4) ug John Paul Sarigumba batok Apolinario Cano Jr. (UD). / ESL