Ang Pilipinas maoy usa sa labing naapektuhan sa gubat sa Iran. Gani ang Asya, labi na ta, maoy labing taas og pagsaka sa presyo sa Diesel nga karon 81.6% na sukad niadtong Pebrero 23, 2026, matod sa Investor’s Insight.
Unsa may atong mahimo para makalahutay ta ining atong sitwasyon karon?
Diay akong mga suhistiyon para makatabok og hinay-hinay ining kalisod sa panahon.
I-focus una ang pagpalit sa mga labing gikinahanglan sama sa pagkaon, bayad sa gipuy-an, sinina, ug emergency funds para sa panlawas.
Ipadaplin una ang ubang mga gusto ug luho.
Simple living lang una . Pag-anad-anad og luto sa balay imbes mangaon o mamalit sa gawas o restaurants.
Unaha og palit ang bugas, itlog, lagutmon, utanon, ug uban pa inay mahalong karne kay gawas nga limpyo, maka-save ka pa unya makaayo pa kini sa panglawas.
Gamita una og unsay naa na daan nimo. Una ka mopalit, pangutan-a imong kaugalingon kon duna pa ba kay ma-recycle paggamit, ma-repair o ma-re-purpose.
Ining paagiha bisag ginagmay, imong ma-save pero at least kontrolado nimo imong kuwarta.
Paninguhaa nga mapa-ubsan nimo imong inadlaw-adlaw nga mga gastuhan sa balay sama sa pagpalong sa suga o unplug sa mga appliances kon way naggamit, ug pagdaginot sa paggamit sa tubig.
I-schedule ang panlaba, palungon ang garipo kon manabon inig panghugas, etc.
Protektahi imong panghunahuna. Ayaw isige og komparar imong kahimtang sa uban.
I-focus ang pagpasalamat sa imong mga grasya bisag unsa ka gamay unya pahinumdomi imong kaugalingon nga temporaryo ra kining sitwasyona.
Puhon og mahuman na ang gubat, mohinay-hinay na sab pagbalik sa naandan ang tanan.
Pangitai og lugar imong kaugalingon sa simpleng kalipay.
Lakaw-lakaw sa gawas o sa imong tugkaran, pakig-bonding sa imong kapamilya, basa sa imong paboritong basahon, paminaw og nindot nga sonata o programa sa radio /telebisyon.
Gawas nga simple kini, libre pa gyud.
Kon madala og sikad, paggamit og bisiklita iwas gasto sa gas unya maka-exercise pa.