Walo ang nangaangol human nahulog sa kimba ug nabalintong ang usa ka jeep de pasaheroan sa national highway sa Brgy. Canamucan, lungsod sa Compostela, amihanang Sugbo sa alas 5:20 sa buntag sa Martes, Mayo 21, 2024.
Kapulisan nipugong sa mga ngan sa mga biktima.
Mga angol mao ang usa ka 44 anyos nga residente sa Brgy. Buluang, Compostela; 38 anyos nga taga Brgy. Magay, Compostela; laing 55 anyos nga taga Brgy. Maslog, dakbayan sa Danao; 36 anyos nga lalaki nga taga Brgy. Magay, Compostela; usa ka babaye nga taga Tingub, dakbayan sa Mandaue; laing babaye nga taga Brgy. Poblacion, lungsod sa Liloan; usa ka babaye nga taga Magay, Compostela; ug drayber nga si Franklin, taga Brgy. Panangban, Compostela.
Sa pasiunang imbestigasyon sa kapulisan sa Compostela ubos sa kamanduan sa ilang hepe nga si P/Capt. Lino Tryss Dacudao Galvan III, nasuta nga ang center post sa passenger jeep nagupok nga niresulta sa pagkawala sa kontrol sa drayber hinungdan nga nahagbong sa kimba sa kilid sa karsada.
Ang mga angol gipangtabang ug gidala sa mga rescuer sa Compostela ngadto sa Danao City Provincial Hospital.
Pasiunang nasayran nga ang drayber maoy moabaga sa mga galastuhan sa pagkaospital sa mga biktima. / DVG