Pipila pa lang ka adlaw human niya nailog ang World Boxing Council (WBC) minimumweight title pinaag sa split decision batok kang Japanese Yudai Shigeoka, gibutyag na ni Filipino Melvin “Gringo” Jerusalem ang sunod nga lakang nga buhaton sa iyang kampo.
Sa interbyo sa www.abs-cbnnews.com, nagkanayon si Jerusalem nga ang mga nagdumala kaniya nagtinguha og rematch ug unification bout kang World Boxing Organization (WBO) minimumweight king Puerto Rican Oscar Collazo.
Si Jerusalem, kinsa gitambayayungan pagdumala nila ni Japan-based Filipina Marivic Matsuura ug JC Manangquil sa Zip Sanman Boxing, maoy kanhi naggunit sa WBO title.
Apan giilog kini ni Collazo gikan kang Jerusalem pinaagi sa 7th round TKO nga kadaugan sa premiro nilang away niadtong Mayo 27, 2023.
Gusto ni Jerusalem nga makabawos ni Collazo, kinsa nikastigo kaniya pinaagi sa body shots.
Hinuon, gitataw ni Jerusalem nga tinguha sab sa iyang managers ang laing unification bout batok sa igsuon ni Yudai nga si Ginjiro, kinsa maoy tag-iya sa International Boxing Federation (IBF) minimumweight belt.
Si Jerusalem, kinsa maoy kasamtangang bugtong world champion sa Pilipinas, adunay 22-3, 12KOs nga rekord. (ESL)