Nagpabilin sa top two spots ang mga Pinoy nga world champions nga sila si Melvin Jerusalem ug Pedro Taduran sa minimumweight division sa bag-ong gipagawas nga rankings sa Ring Magzine, ang gikonsiderar nga bibliya sa boksing.
Si Jerusalem kinsa maoy World Boxing Council (WBC) minimumweight champion, maoy No. 1 samtang si Taduran kinsa maoy International Boxing Federation (IBF) minimumweight king, maoy No. 2.
Naa sa ibabaw sa duha ka mga Pinoy mao si World Boxing Association (WBA) ug World Boxing Organization (WBO) unified minimumweight champion Oscar Collazo sa Puerto Rico kinsa giila sa Ring Magazine nga lineal world champion.
Adunay mga plano nga iparang si Jerusalem o Taduran batok ni Collazo sa dili pa mahuman ang tuig 2025.
Naa sa ikatulong puwesto si kanhi WBA titlist Knockout CP Freshmart sa Thailand kinsa maoy gilupi ni Collazo aron angkunon ang Ring ug WBA titles.
Si kanhi IBF champion Ginjiro Shigeoka sa Japan natangtang na sa ranking human kini naahat pagretiro og sayo tungod sa brain damage nga iyang nasinati human sa duha nila ka away ni Taduran.
Ang igsuon ni Shigeoka nga si Yudai naa sa ikaupat nga luna bisan sa duha ka mga pilde nga nasinati niini batok ni Jerusalem.
Laing duha ka mga Pinoy ang naa sa top 10 sa listahan nga mao sila si No. 9 Joey Canoy ug no. 10 Vic Saludar. / ESL