Gituldokan ni Melvin Jerusalem ang kahidlaw sa Pilipinas og world title human niya giilugan og korona si World Boxing Council (WBC) minimumweight champion Japanese Yudai Shigeoka pinaagi sa split decision nga kadaugan niadtong Dominggo sa gabii, Marso 31, 2024, sa International Conference Hall sa Nagoya, Japan.
Sa interbyu sa Sun.Star Cebu, igsuong buhatan ning mantalaan, nagkanayon ang kanhi sakop sa nabungkag nga ALA stable sa Sugbo, nga mao kini ang katumanan sa iyang damgo.
Si Jerusalem kanhi World Boxing Organization (WBO) minimumweight champion apan iyang gitataw nga ang bakus sa WBC mao gyud ang iyang gipangandoy.
Sa 1st round pa lang, napasakitan na ni Jerusalem si Yudai pinaagi sa body shot.
Sa 3rd round, nakarehistro og knockdown si Jerusalem pinaagi sa iyang counter right straight nga niigo sa ulo ni Yudai.
Laing right straight ni Jerusalem ang nagpatumba og balik ni Yudai sa 6th round.
Matod ni Jerusalem nga ang iyang body punch mao gyud ang naa sa ilang plano sa iyang trainer nga si Michael Domingo apan nasulbad kini sa kampo ni Yudai.
Gipasabot ni Jerusalem nga nigamit sila og laing kumbinasyon aron maguba ang depensa ni Yudai.
Taliwala sa iyang naposte nga duha ka knockdowns, napilde si Jerusalem sa scorecard sa usa ka judge, 114-113.
Hinuon midaog si Jerusalem sa laing duha ka judges, 114-112, 114-112.
Ang Pilipinas wala’y world title human napilde si Marlon Tapales sa ilang super bantamweight unification bout ni Japanese Naoya “Monster” Inoue niadtong Disyembre, 2023.
Matod ni Jerusalem nga dako niyang kalipay nga nahatagan niya pagbalik og world title ang Pilipinas.
Si Jerusalem nisaka sa 22-3, 12KOs nga rekord samtang si Yudai nahagbong sa 8-1, 5KOs nga baraha.
Sa laing bahin, napakyas ang laing Pinoy nga si Jake Amparo sa iyang tinguhang makalabni og world title.
Nasugamak si Amparo sa 2nd round knockout nga kapildihan batok sa manghod ni Yudai nga si Ginjiro sa ilang International Boxing Federation (IBF) minimumweight title fight.
Si Amparo natagak sa 14-6-1, 3KOs nga baraha samtang si Ginjiro nisulbong sa 11-0, 9 KOs nga rekord. / EKA