
Nag-atubang og disqualification case si vice mayoral candidate Jose “Joey” Daluz III sa Commission on Elections (Comelec) tungod sa kalapasan sa ilang lagda sa pagpamutang sa iyang mga campaign materials sa dili designated area.
Si Daluz nalakip sa 24 ka mga kandidato sa tibuok nasod nga gikiha sa Comelec Task Force Baklas.
Matod ni Comelec Chairman George Erwin Garcia niadtong Miyerkules, Mayo 7, 2025, nagpalinguglingog lang si Daluz dihang gimanduan nga panangtangon ang iyang campaign materials.
Si Daluz kanhi chairman sa Board of Directors sa Metropolitan Cebu Water District ug kanhi konsehal sa Dakbayan sa Sugbo, magpapili pagka bise mayor isip ka- tandem ni Mayor Raymond Alvin Garcia ubos sa alyansa Kusug-Panaghiusa Party.
Sa iyang text message nga gipadala sa SunStar Cebu, si Daluz niingon nga wala siya makadawat og notice gikan sa Comelec.
Base sa Comelec guidelines, ang campaign materials maisip nga ilegal kon wala kini mosunod sa gitakda nga gidak-on ug ipamutang sa mga dili designated areas sama sa poste sa kuryente o mga punoan sa kahoy.
Ang Comelec 7 nilusad og lapad nga operasyon aron panangtangon ang propaganda materials sukad niadtong Marso 28, nga maoy pagsugod sa kampanya sa lokal. / EHP