Gipadad-an na og summons sa Commission on Elections (Comelec) si Mayor-elect Thadeo Jovito “Jonkie” Ouano human sa election protest nga gisang-at ni outgoing Mayor Jonas C. Cortes kalabot sa resulta sa lokal nga eleksyon niadtong Mayo 12, 2025.
Ang summons pinetsahan og Mayo 23, 2025, gipagawas sa Electoral Contests Adjudication Department (Ecad) sa Comelec nga nagpahibalo kang Ouano sa election protest nga gisang-at batok kaniya ni Cortes.
Ang kaso gi-docket isip EPC No. 2025-010.
Gimanduan sa Comelec si Ouano nga isumiter ang iyang tubag sa protesta sulod sa lima ka adlaw gikan sa pagkadawat sa summons ug kini dili na puwedi nga lugwayan.
Kinahanglan siyang mo-file og upat ka hard copy sa iyang tubag diin usa niini ang kinahanglan nga orihinal uban sa bisan unsang mga annexes o ebidensya nga may kalabutan sa protest.
Kinahanglan sab isumite ang tubag sa Ecad office sa ika-8 nga Andana sa Palacio del Gobernador, Intramuros, Manila.
“In case your answer incorporates a counter-protest, it shall be subject to the legal fees and charges provided under the Rules,” nalatid sa summons.
Ang protesta nanukad sa mga pasangil sa tikas sa eleksyon ug mga iregularidad sa pipila ka clustered precincts sa Mandaue nga si Cortes nangangkon nga nisobra ang gidaghanon sa boto lapas sa narehistrong botante o kadtong aktuwal nga nibotar.
Ang iyang kampo naghisgot og “intrinsic fraud” nga naglambigit sa vote-counting system ug “extrinsic fraud” nga konektado sa pagpahigayon sa eleksyon. / CAV