Gitun-an karon sa kagamhanan sa Dakbayan sa Mandaue ang posibilidad nga bawion ang 15 ka mga sakyanan nga kaniadto gidonar ngadto sa mga Sangguniang Kabataan (SK) chairpersons sa miaging administrasyon. Gikonsiderar kini tungod sa panginahanglan nga mapahimuslan ang mga resources sa gobiyerno ug matubag ang mga kakuwang sa operasyon sa ubang departamento sa siyudad.
Sa usa ka interbyu niadtong Martes, Hulyo 1, 2025, si Mayor Thadeo “Jonkie” Ouano niingon nga ang iyang Legal Office kasamtangang nag-review sa kabalido sa donasyon, nga gipaubos sa usa ka deed ug giaprobahan sa Konseho niadtong Hunyo 9, 2025.
Ang donasyon gihimo sa wala pa opisyal nga nilingkod si Ouano isip mayor.
Ang mga sakyanan nagkantidad og P1.5 milyunes matag usa, gitunol ngadto sa mga SK chairperson gikan sa 15 sa 27 ka barangay sa siyudad kaniadtong Nobiyembre 2024.
“Atong gitun-an kung mahimo ba ibawi kining mga gi-donar nga sakyanan. Ubos pa ni sa legal review, busa wala pa’y final,” matod ni Ouano.
Giklaro ni Ouano nga wa siyay intensyon nga piangan ang SK, apan kinahanglan nga unahon ang mas importante nga kagamitan sa mga sakyanan.
Gipasabot ni Ouano nga ang siyudad una nga mosusi kung ang ordinansa nga nag-aprobar sa donasyon ubos ba sa bisan unsang legal nga restriksyon.
Giklaro niya nga ang mga sakyanan dili lang para gamit sa SK, apan gituyo aron suportahan ang mas lapad nga mga paningkamot sa komunidad lakip na kadtong gipangulohan sa lainlaing departamento sa siyudad uban sa SK.
“Wala’y batok sa SK,” matod niya, nga nipasabot nga ang katuyoan mao nga kapahimuslan ang mga sakyanan sa lainlaing opisina nga labing nagkinahanglan niini.
Dugang niya nga ang ubang departamento, sama sa City Health Office, Market Operations, ug Agriculture Office, naglisod tungod sa kakulang sa mga functional nga sakyanan.
Samtang gipormal ang paghatag sa usa ka deed of donation ug legal nga gibalhin ang pagpanag-iya sa mga sakyanan, wala kini mapasar nga wa moagi og debate.
Ang mga miyembro sa oposisyon nga kaalyado ni Ouano sa konseho nagpahayag og kabalaka sa tayming ug prayoridad sa donasyon.
Gikuwestiyon ni Konsehal Joel Seno kung ang tayming ug prayoridad sa donasyon angay ba, tungod sa kakuwang sa logictics sa siyudad.
Ang kasamtangang administrasyon mosusi kung ang donasyon ubos pa ba sa pag-review.
Si SK federation president Flueritz Gayle Jumao-as nanalipod sa donasyon ug niingon nga ang mga sakyanan importante sa pagsuporta sa mga gimbuhaton sa kabatan-onan, ilabi na sa hilit nga mga barangay nga lisod sudlon.
Ang administrasyon ni Ouano desidido alang sa usa ka mas lapad nga audit sa mga kabtangan sa gobiyerno. / CAV