IPADAYON ni Mandaue City Mayor Thadeo “Jovito” Ouano ang Mandaue Government Center human niya masusi nga daghan sa mga opisina ang naghuot sa gamay nga lugar.
Namatikdan niya nga daghang opisina ang nag-okupar sa gagmay ug dili igo nga mga espasyo sa daghang katuigan.
Matod sa mayor nga ang nagpadayon nga konstruksyon sa government center makasulbad sa kahuot sa mga opisina.
Dugang niya nga ang pasilidad maghatag og mas haom nga kahimtang sa pagtrabaho alang sa mga empleyado sa siyudad.
Matod ni Ouano nga orihinal niyang gikonsiderar ang pagsulod sa usa ka Public-Private Partnership (PPP) alang sa proyekto ug siya nagpabiling bukas sa pagtrabaho uban sa mga pribadong kompanya nga andam makigtambayayong.
Giklaro niya nga ang likod nga bahin sa lugar sa konstruksyon nga kaniadto gituohan nga bahin sa kasikbit nga property sa CICC, wala gilakip sa orihinal nga mga plano.
Ang kasamtangang building nga gihulagway nga “iconic building,” gitukod ibabaw sa kanhi parkinganan.
Dugang niya nga ang iyang orihinal nga gusto mao ang pagtukod sa government center tupad sa Mandaue City Sports Complex tungod sa kataas sa value sa yuta ug potensyal alang sa joint ventures sa pribadong mga negusyante. / CAV