Nangayo og tabang pinansyal ang mga opisyal sa Mandaue City sa Senado aron mapundohan ang duha sa labing dako nilang proyekto: usa ka bag-ong ospital sa siyudad ug ang pagpalapad sa Mandaue City College.
Ang gibanabana nga kinatibuk-ang gasto sa duha ka proyekto moabot sa P1.5 bilyon.
Niadtong Agusto 6, 2025, usa ka delegasyon gikan sa Mandaue, pinangulohan ni Mayor Thadeo Jovito “Jonkie” Ouano, Lone District Representative Emmarie “Lolypop” Ouano-Dizon, ug Kapitan Nixon Dizon, personal nga nakigkita sa lima ka senador: Alan Peter Cayetano, Bong Go, Ronald “Bato” Dela Rosa, JV Ejercito, ug Lito Lapid. Gitunol sa grupo ang mga proposal ug pormal nga nangayo og budget allocations alang sa duha ka proyekto.
Matod ni City Administrator Sally Malig-on, ang pagbisita kabahin sa paningkamot sa siyudad nga direktang mangayo og tabang sa nasyonal nga gobyerno alang sa mga infrastructure project nga di maigo sa budget sa Mandaue.
Ang Mandaue City Hospital, gibanabana nga mogasto og hapit P1 bilyon.
Kini ang mahimong labing una nga kompleto nga public hospital sa siyudad.
Gipasabot ni Mayor Ouano nga kung magsalig lang sa budget sa siyudad, dugay kaayo kini mahuman.
Gilauman nga masugdan ang konstruksyon sunod tuig. / CAV