Bisan pa sa mga hagit sa pagka-single mother, kakabus, ug limitadong edukasyon, ang lig-on ug walay puas nga pagpaningkamot ni Marigold Dayondon alang sa iyang komunidad ug pagpanguna sa Department of Social Welfare and Development (DSWD)–Kapit-Bisig Laban sa Kahirapan – Comprehensive and Integrated Delivery of Social Services (Kalahi-CIDSS) ubos sa Philippine Multisectoral Nutrition Program (PMNP) nagpakita sa kusog, paglahutay, ug tinuoray nga alang sa kausaban.
Natawo siya sa kalisod ug kutob ra sa high school ang iyang natapos tungod sa kahimtang sa ilang pamilya hinungdan nga naputol ang iyang damgo nga makapadayon sa pag-eskwela ug makab-ot ang mas maayong kaugmaon.
Bisan pa man, wala kini nakapugong sa iyang determinasyon.
Isip usa ka single mother, gipadako ni Marigold ang iyang anak samtang naningkamot nga mapalambo ang ilang barangay alang sa tanang kabataan.
Nagsugod ang iyang journey sa pagboluntaryo sa dihang niapil siya sa Kalahi-CIDSS-PMNP program diin iyang nakita ang kahigayunan nga makaalagad sa komunidad ug ma-develop isip lider bisan pa man sa kalisod sa pinansyal.
Ang iyang tinuoray nga dedikasyon, kadasig, ug walay kapoy nga paningkamot nakahatag kaniya og pasidungog.
Tungod sa iyang edukasyon, gitudlo si Marigold isip Chairperson sa Community Nutrition Sub-Project Management Committee (CNSPMC).
Sa iyang papel isip lider, hugot niyang gisagop ang mga prinsipyo sa community-driven development.
Nakig-alayon siya sa mga lumolupyo aron maghimo ug magpatuman og mga programa sa nutrisyon nga motubag sa talagsaong panginahanglan sa ilang komunidad.
Tumong sa PMNP nga makunhuran ang malnutrisyon, ilabina ang kulang ang gitas-on sa mga bata nga ubos sa singko anyos pinaagi sa pagpalig-on sa paghatag sa nutrisyon ug serbisyo sa panglawas sa lokal nga lebel.
Ubos sa giya ni Marigold, ang komitiba naglunsad og mga inisyatibo nga nitubag sa kritikal nga mga isyu sa kahimsog ug nutrisyon samtang nagpalambo og malungtarong kalambuan sama sa pagtukod og mga communal sanitary toilets ug mga proyekto sa kalambuan sa komunidad ug sosyal nga imprastruktura nga nakabenepisyo sa kapin 500 ka mga benepisyaryo.
Bisan pa sa iyang mga kalampusan, daghang mga hagit ang nasinati ni Marigold sa iyang journey.
Ang kakulang sa pinansyal nga kapasidad maoy kanunay nga babag sa pagtambong sa mga seminar, pagbiyahe paingon sa mga bangko, ug pagdumala sa pundo sa proyekto nanginahanglan og resources nga kasagaran labaw sa iyang makaya.
Bisan pa sa mga hagit, wala gayud kini nakapahunong kaniya. Ang dedikasyon ni Marigold sa programa ug sa iyang komunidad nagpabiling lig-on ug matinud-anon.
Walay kapoy siyang naningkamot sa pagpangita og mga solusyon bisan pa man kini nagpasabot sa pagpangayo og tabang sa lokal nga komunidad o pagpangita og kaugalingon nga paagi aron molampos bisan aduna lang limited resources.
Ang exemplary service ug leadership ni Marigold sa mga kababayen-an sa ilang komunidad wala magpabiling wala tagda. Tungod sa iyang dedikasyon sa programa nga Kalahi-CIDSS, siya nahimong usa ka miyembro sa Barangay Health Worker team sa Barangay Don E. V.
Pinaagi niining tahas, siya nagpadayon sa paghimo og dakong kausaban sa kahimsog ug kaayohan sa mga katawhan nga iyang gisilbihan.
Karon, ang estorya ni Marigold usa ka gamhanang pahimangno sa kusog nga anaa sa tinuoray nga pag-alagad. Ang iyang journey nga napuno sa sakripisyo, paglahutay, ug halangdong gugma para sa komunidad, nagpamatuod nga ang usa ka babaye nga adunay katuyoan ug kasingkasing makahimo og malungtaron nga kausaban.
Si Marigold nagpadayon sa pagdasig sa mga tawo sa iyang palibot nga nagpakita nga bisan pa sa mga kalisdanan, posible gihapon nga makahatag og kausaban ug makapabangon sa uban.
Ang panaw ni Marigold layo pa sa pagkahuman ug uban sa iyang kasingkasing nga puno sa katuyoan, siya magpadayon sa pagserbisyo ug pagdasig sa daghang umaabot nga mga tuig. / PR