Nibutyag si Justin Bieber sa iyang anger issues ug emotional exhaustion nga nagpakita sa kasagmuyo human siya gisige og ingnan nga magpakaayo, bisan pa man iya na kining gisulayan sa tibuok niyang kinabuhi.
Sa usa ka Instagram posts, gihulagway ni Bieber nga ang iyang kasuko usa ka reaksiyon sa lawom nga trauma ug kasakit nga iyang naagian.
Sa usa ka text exchange nga iyang gipakita sa social media, giputol ni Bieber ang usa ka panaghigalaay human siya giingnan nga ang iyang kasuko daw mura og “lashing out.”
Iyang gipasabot nga dili makiangayon ang pagpugos sa usa ka tawo nga nakaagi og trauma nga dili ipakita ang ilang tinuod nga gibati.
“My anger is a response to pain I have been through. Asking a traumatized person not to be traumatized is simply mean,” matod ni Justin sa giulat sa Hollywood Reporter.
Matod pa niya, ang iyang pagtuo kang Hesus maoy naghatag og kadasig sa pagtutok sa uban ug sa pagpadayon sa iyang kinabuhi.
Ang maong mga pahayag nilugwa taliwala sa bag-ong kontrobersiya, lakip na ang viral nga video diin ang mga paparazzi nang-harass kaniya sa wala pa ang Father’s Day.
Gidepensahan ni Bieber ang iyang reaksiyon sa video ug niingon nga ang iyang kasuko sagad nga na-misinterpret nga daw wala siyay respeto. Apan para kaniya, kini usa ka hangyo lamang nga hatagan siya og basic human respect ug privacy.