"This is my gift to him."
Mao kini ang paghulagway sa playwright, director, ug founder sa Teatro de San Pedro Calungsod nga si Msgr. Agustin V. Ancajas alang sa lima ka mga Binisayang dula nga giandam nila alang sa Jubilee Year.
Si Msgr. Ancajas nagkanayon nga regalo niya alang sa nipanaw nga Santo Papa ang mga dula nga giandam sa ilang teatro.
Gilusad kagabii, Mayo 2, 2025, sa Blackbox Little Theater, CSPC, SM Seaside Complex, ang lima ka Mga Dula sa Paglaum haom alang sa tema karong Jubilee Year nga Pilgrims of Hope.
Matod ni Msgr. Ancajas nga gibase niya ang mga estorya sa dula sa mga elemento sa kaluoy nga gisaysay sa kanhi Santo Papa Pope Francis alang sa Jubilee Year.
Naglakip sa Mga Dula sa Paglaum ang "Way Sandalyas ni Puntil," "Dance of the Black Swan," "Finding My Light," "Misa Requiem," ug "Homecoming."
Drama ug horror-comedy ang nag-unang mga genre niining mga dula diin molungtad kini og tulo ka oras.
Lakip sa mga hisgutan sa maong mga dula ang kabahin sa gugma sa inahan sa iyang anak nga piniriso, ang kasamtangang kultura sa mga kabatan-onan nga dili na mounong sa ilang mga tiguwang nga mga ginikanan, ang kabahin sa mga sakristan nga wala ni-remit sa kuwarta nga alang sa misa para sa patay kay ilahang gibayle, ug uban pa.
Matod ni Msgr. Ancajas nga modagan ang maong mga dula tibuok tuig.
Ang Mga Dula sa Paglaum mamahimong matan-aw sa publiko ug mapalit ang tickets sa P250. Mamahimong mobisita sa Facebook page sa Teatro de San Pedro Calungsod alang sa dugang detalye. (Herty B. Lopez)