Kabalayan sa Lawaan II sa Talisay, gidemolis

Kabalayan sa Lawaan II sa Talisay, gidemolis
COURT ORDER: Usa ka demolisyon ang gihimo sa Sitio Iba, Barangay Lawaan II, Dakbayan sa Talisay, Cebu, niadtong Lunes, Hunyo 16, 2025. Niadtong Abril 21, napakyas ang unang pagsuway sa demolisyon human naalarma ang mga residente sa kalit nga pag-abot sa demolition team nga gilangkuban sa gibana-banang 50 ka tawo nga walay pahibalo. / CDF
Published on

HUMAN sa walo ka bulan sukad giaprobahan sa korte ang demolition order, ang mga balay sa Sitio Iba, Barangay Lawaan II, Siyudad sa Talisay, ang gipangguba niadtong Lunes, Hunyo 16, 2025, nga nakaapekto sa mga lumolupyo.

Gihimo ang demolisyon pinasikad sa desisyon sa Municipal Trial Court in Cities (MTCC) Branch 1 sa Talisay City niadtong Enero 3, 2023, pabor sa yuta ni Vitaliana Borromeo-Yunting nga girepresentahan ni Manuel B. Yunting.

Gimando sa korte ang kapin sa 60 ka ginganlan nga indibiduwal ug ubang nangangkon nga biyaan ang 4,591-metro kuwadrado nga luna ug itugyan ang posisyon ngadto sa mga nagkiha.

Human sa writ of execution niadtong Agosto 27, 2024, gihatag ni Acting Presiding Judge Charina G. Navarro-Quijano ang mosyon alang sa demolisyon niadtong Oktubre 8, 2024. 

Ang apektadong lugar sakop ubos sa Transfer Certificate of Title No. T-28048.

Niadtong Abril 21, 2025, napakyas ang unang pagsulay sa demolisyon tungod sa pagsukol sa mga residente.

Matod ni Rissah Amahan, presidente sa Aulan Residents Multi-Purpose Association for Progress Inc. (ARMAPI), ang sitio gibana-banang 18,000 metro kuwadrado ug gipuy-an sa kapin sa 200 ka pamilya. 

Nidugang siya nga ang demolisyon gibase sa gikasungian nga luna nga ang mga nangangkon napakyas sa pagpahigayon og saktong survey ug nihangyo og “boundary survey.” Si Amahan ug ang grupo nagpadala og mga sulat niadtong Marso 14 ug 17, 2025, nga gitumong sa mga opisyal lakip na ang Police Regional Office (PRO) 7 ug ang Department of the Interior and Local Government (DILG, nga naghangyo nga dili mohatag og police assistance tungod sa ilang gihulagway nga kapakyas pagtuman sa Seksyon 28 sa Urban Development and Housing Act of 1992.

Agi og tubag, si Police Brigadier General Redrico A. Maranan sa PRO 7 nikumpirmar sa hangyo ug giklaro nga walay police assistance ang ihatag gawas kon “kompleto ang pagtuman sa mga balaod, regulasyon, ug standard operating procedures sa PNP.”

Ang komunikasyon pinetsahan og Marso 17, 2025.

Giduso sab sa grupo ang mga kopya sa ilang mga kabalaka sa nagkadaiyang buhatan, lakip na ang Office of the Mayor, Ombudsman-Visayas, mga opisyal sa barangay, ug ang City Housing Office nga naghangyo og striktong pagpatuman sa mga giya alang sa demolisyon ug eviction procedures aron maprotektahan ang apektadong pamilya.

Ang demolisyon niadtong Hunyo 16, nahitabo bisan wala pa masulbad nga mga kabalaka nga nagtimaan sa pagpatuman sa dugay nang mando sa korte. / CDF 

Trending

No stories found.

Just in

No stories found.

Branded Content

No stories found.

Videos

No stories found.
SunStar Publishing Inc.
www.sunstar.com.ph