Naghiusa ang kabatan-onan sa Barangay San Nicolas Proper kagahapon, Mayo 25, 2025, alang sa usa ka educational ug makalingaw nga kalihukan nga nagtumong sa pagpataas sa kahibalo ug pagpugong sa Human Immunodeficiency Virus (HIV) ug uban pang sexually transmitted infections (STIs).
Ang inisyatibo nga gitawag og “ABCDE: Edukasyon sa Maayong Panglawas” usa ka science communication campaign nga gimugna sa mga estudyante sa Cebu Technological University sa BS Development Communication 2-1 ubos sa mentorship ug gisalmotan ni Macky Maravillas isip guest speaker.
Kini nga kalihukan usa sa ilang mga output sa kurso nga Communicating Science for Development nga nag-focus sa Cebuano writing.
Ang maong aktibidad nagsentro sa pagpasabot sa siyentipikong impormasyon kabahin sa HIV gamit ang yano ug masabtan nga mga pulong, aron maabot gyud ang kadaghanan sa mga tawo ilabina ang kabatan-onan.
Sa venue sulod sa barangay, daghan’g batan-on nga nanambong ug nisalmot sa mga diskusyon ug presentasyon nga nagtuki sa transmission sa HIV, mga sintomas, stigma, ug preventive measures.
Nag-andam sab ang mga estudyante og Information, Education, and Communication (IEC) materials sama sa printed ug digital nga naglangkob sa impormasyon kabahin sa mga mosunod:
Unsa ang HIV
Kalainan sa HIV, AIDS, ug STI
Mga dili tinuod o myths kabahin sa HIV
Mga paagi nga makatakod kini
Ug ang ABCDE prevention strategy aron malikayan ang HIV
Ang mga brochure nga giapudapod sa mga partisipante giulohan og “Mga Sintomas sa HIV ug mga Klase sa STIs” ug “Mga Pamaagi sa Paglikay sa HIV” nga gisulat sa sinultian nga Cebuano aron mas masabtan sa lokal nga komunidad.
Gipili sa mga estudyante ang maong tema tungod kay base sa labing bag-ong balita, ang Central Visayas ilabina ang Cebu nahimong number one na sab sa mga rehiyon nga may labing taas nga kaso sa HIV sa tibuok Pilipinas.
Human sa mga panaghisgot, nagsugod sab ang libreng HIV testing nga gihimo sa Department of Health (DOH) uban sa suporta sa Cebu United Rainbow LGBTQIA+ Sector Inc. (Curls).
Ang kampanya adunay sa mensahe nga, “Mag-amping, Ila-ilahon, HIV atong Sugpuon!” usa ka panawagan nga likayan ang kahadlok ug pagdumili sa paghisgot sa HIV ug tabangan ang komunidad sa pagsabot sa kamatuoran ug pagprotektar sa ilang panglawas.
Ang kalampusan sa maong kalihukan nagpamatuod sa dedikasyon sa mga estudyanteng organizer ug sa lig-on nga suporta sa mga lokal nga opisyal ug kauban sa komunidad sa ilang paningkamot sa pagpalambo sa pampublikong kahimsog ug edukasyon para sa kabatan-onan.
Sa padayon nga kalihukan sama niini, ang Barangay San Nicolas Proper maamahimong usa ka komunidad nga mas aduna’y kahibalo ug kahimsog nga pangisip. / PR