Nakabsan sa kinabuhi ang usa ka dakong kabaw nga nagsabak og lima ka buwan ang nakuryentihan sa Sityo Hintusan, Brgy. Adlaon, siyudad sa Sugbo.
Si Adlaon Brgy. Kapitan Gemma Arcayan nga gikahinabi sa Superbalita Cebu nagkanayon nga alas 7:00 sa buntag sa Huwebes, Hulyo 25, siya gipahibalo sa hitabo.
Matod ni Arcayan, ang tag-iya sa maong kabaw mao ang iyang pag-umangkon nga si Romel Archival apan gipabuhi ni Samuel Leyson nga tanod sa barangay.
Matod sa Kapitan, ang dapit nga gitugwayan ni Leyson sa kabaw aron makasibsib og sagbot dunay grounded nga linya sa kuryentihan.
Dason ni Arcayan, ang iyang konsehal nga si Lodelito Gabud nisusi usab sa maong hitabo ang nipahibalo kaniya nga ang banting nga para poste sa kuryenti maoy grounded ug ilang gidudahan ang kabaw nabag-id niini. Ang kabaw gibanabana nga molor og P50,000. / DVG