Temporaryong mopatuman ang kagamhanan sa Lapu-Lapu City og hingpit nga pagsira sa duha ka lanes sa karsada gikan sa Barangay Punta Engaño hangtod sa Munisipalidad sa Cordova alang sa tinuig nga Ironman 70.3 triathlon karong Dominggo, Agusto 10, 2025.
Inabagan sa Ordinance 17-002-2025, ang hingpit nga pagsira sa karsada ipatuman gikan sa alas 4:00 sa buntag hangtod sa alas 2:00 sa hapon.
Ang isirado nga kadalanan magsugod sa Mactan junction sa Punta Engaño Road paingon sa Mangal, ug gikan sa Mactan junction paingon sa Marigondon intersection hangtod sa utlanan sa Lapu-Lapu City ug Cordova.
Alang sa Ironkids, nga ipahigayon karong Sabado, Agusto 9, ang pagsira magsugod sa alas 6:00 sa buntag hangtod sa alas 10 sa buntag.
Usa ka bahin sa Punta Engaño Barangay Road, nga gikan sa gawas sa Dusit Thani Hotel paingon sa Arterra Hotel, ang isirado sab sa trapiko.
Matod ni Lieutenant Colonel Christian Torres, tigpamaba sa Lapu-Lapu City Police Office (LCPO), sa interview sa media, dul-an sa 400 ka mga personahe ang i-deploy aron ma-monitor ang rota sa lumba.
Gibutyag ni Torres nga sugod karong Huwebes, Agosto 7, i-deploy na ang mga polis ug wala’y personahe nga tugotan nga mo-leave sugod ning adlawa hangtod mahuman ang dakong kalihukan.
Kini nga direktiba gipagawas agi og tubag sa pag-abot sa mga partisipante sa billeting area ug agi og preparasyon sa Reyna Bulakna 2025 Run nga gikatakda karong Biyernes, Agusto 8.
Ang Ironman 70.3 triathlon gilauman nga mo-accommodate og labing menos 2,000 ka delegates. / DPC