Moabot sa 199 ka mga indibiduwal o 49 ka mga pamilya nga namuyo sa Sitio Litmon, Barangay Dumlog, Dakbayan sa Talisay ang gipabakwit tungod sa dagkong bawod sa Miyerkules, Oktubre 23, 2024.
Gipahibawo sa Provincial Disaster Risk Reduction and Management Office (PDRRMO) nga kini gumikan sa dagkong bawod sa kadagatan sa dapit tungod sa bagyong Kristine.
Ang maong mga residente kasamtangan nga nahimutang sa basketball court sa maong barangay.
Samtang Ceres bus nadusmo sa punoan sa nangka sa Kotkotan, lungsod sa Alegria, Sugbo kay adunay gilikayan nga sanga sa kahoy sa ilang pagbiyahe nga naggikan sa Cebu City ug paingon sa lungsod sa Santander.
Ang maong insidente nahitabo sa alas 8:30 sa buntag, Miyerkules, Oktubre 23.
Maayo na lang kay wa kaayoy pasahero nga sakay sa maong bus ug dili sab kusog ang impact sa pagkadusmo sa dihang gituyo sa drayber nga si Edwin Alfeche, 44 tungod sa kusog nga hangin.
Laing bahin usa ka dako nga punoan sa Gemilina ang natumba sa Simala, Sibonga gumikan sa kakusog sa hangin, wa hinuoy naangol sa maong hitabo ug gihimo gilayon ang clearing operation sa dihang miali ang punoan sa kalsada. / ANV, DVG