Kahinay sa supply sa tubig tungod sa taas nga demand

Gipasabot sa Metropolitan Cebu Water District (MCWD) nga way pagkunhod sa ilang suplay ug ang nasinati nga low water pressure sa ubang dapit resulta sa taas nga pagkunsomo sa ilang mga konsumidor.

Ang tigpamaba sa MCWD, Minerva Gerodias nitataw nga ang ilang water production nagpabilin sa 300,000 cubic meters matag adlaw ug ang nagpadayon nga kainit sa panahon wa pa makaapiktar sa surface water supply.

Apan dunay mga taho nga nakasinati og low water pressure sa ubang dapit ilabi na ang interior ug elevated areas sa Talisay City ug Cebu City.

Kini nahimutang sa Barangay Dumlog, San Isidro, ug Pooc sa Talisay City, ug Barangay Inayawan, San Roque, Mambaling, Bulacao, Duljo Fatima, ug Tagunol area sa Cebu City.

Matod ni Gerodias nga ang pagtuo nga niubos ang suplay sa MCWD resulta sa taas nga demand sa mga konsumidor ug dili ang pagkunhod sa supply.

Hinuon ang MCWD nangandam na kon mahitabo gyud ang isyu sa suplay sa tubig.

Naka-standby na ang ilang mga water tanker susama sa ilang gihimo sa miaging tuig nga El Niño phenomenon.

“Naa nami water truck on standby, but for now wala pa mi nag-deliver,” matod ni Gerodias.

Usa sa mga paagi sa MCWD nga magpadayon ang ilang pagsuplay sa tubig mao ang operasyon sa ilang desalination plants sa Opon, Mandaue City ug sa Mambaling, Cebu City.

Ang desalination process, nga maghimo sa tubig-dagat nga potable water, di maapiktahan sa usab-usab nga panahon sama sa El Niño.

“Ang desalination plant kay dili gyud na maapektuhan sa El Niño or sa summer kay gikan sa dagat ang tubig,” dugang ni Gerodias.

Ang Mambaling plant nagsuplay og 5,000 cubic meters matag adlaw ug moabot pa og 10,000 cubic meters kon gikinahangan.

Samtang ang Mandaue desalination plant nagsuplay og 10,000 cubic meters matag adlaw.

Gitambagan niya ang mga konsumidor nga nakasinati og hinay nga agas nga magpundo og tubig sa panahon nga kusog ang pressure atol sa off-peak hours.

“We also ask the public to conserve water. If you live in an elevated area and those at lower elevations waste water, it affects the supply reaching your area,” dugang ni Gerodias.

Sa iyang bahin, si Cebu City Mayor Raymond Alvin Garcia nimando niadtong Lunes, March 10, sa Cebu City Agriculture Department sa pagpadali sa mga pagpangandam aron matubag ang kakuwang sa tubig sa mga mountain barangays sa summer season.

Gimando sa mayor ang pag-inventory sa mga existing water tankers ug pagpamalit sa dugang equipment aron matabangan ang mga apiktado.

Ang kagamhanan sa siyudad nagpaabot sa pag-deliver sa unom ka mga bag-o nga water tanker.

Aron masulbad ang kakuwang sa tubig, si Garcia nagpapalit og 2,000-liter ug 4,000-liter container tanks, nga ipamutang sa mga mountain barangay.

Nunot sa daghang hangyo, ang mayor nimando sa dinalian nga pagpadala og water tankers sa mga dapit nga nagnihit ang tubig sama sa Barangay Sudlon 1 ug 2, aron pagseguro nga duna silay suplay. / EHP