Kainit, kakuwang sa koordinasyon gireklamo

Kainit, kakuwang sa koordinasyon gireklamo
Photo by Earl Padronia

Mokabat sa tulo ka milyon ka mga tawo ang ningdagsa sa South Road Properties (SRP) sa dakbayan sa Sugbo aron motan-aw sa Sinulog Grand Parade ug Grand Ritual Showdown niadtong Dominggo, Enero 21, 2024.

Ang crowd estimate gihatag sa Cebu City Police Office.

Ang init nga temperatura wala makapugong sa mga naghudyaka sa pagtan-aw sa 17 ka contingents nga magtigi alang sa grand prize nga P3 milyunes sa libre nga interpretasyon ug Sinulog-based nga mga kategoriya. Nangita sila’g kapasalipdan bisan asa nila kini makit-an.

Apan, ang mga contingent, nga naglakip sa upat ka mga guest performer, dili kaayo swerte.

Gipadayag nila ang ilang pagkadiskontento, nitumbok sa lugar nga dili komportable ug ang programa dili maayo nga pagkahan-ay.

Grabeng hagit ang giatubang sa mga mananayaw tungod sa grabeng kainit.

Usa ka handler sa Pundok Banilahadnon sa Banilad, Cebu City, kinsa nihangyo nga dili nganlan, niingon nga ang mga dancer nakasinati na sa epekto sa makapaso nga temperatura bisan wala pa sila nagsugod sa pagpasundayag.

Ang handler niingon nga tulo ka dancers ang ilang dad-on sa tambalanan human sila nakuyapan.

Niabot sa 30.8 degrees Celsius ang temperatura sa alas 2 sa hapon nga adunay relative humidity nga 60 percent ug heat index nga 35 degrees Celsius, sumala sa Philippine Atmosphe­ric, Geophysical and Astronomical Services Administration Mactan Station, nga nag-aghat sa publiko nga mag-amping.

Gawas sa pag-atubang sa kainit, ang handler niingon nga ang mga dancer sukad pa sa kaadlawon nagmata tungod sa sayo kaayo sa call time.

Bisan pa niini nga mga kahimtang, ang mga miyembro sa lainlaing mga contingent nagpabilin nga taas ang espirito, sumala sa ilang mga choreographer.

Matod pa nila nga kinahanglan silang magmalig-on tu­ngod kay ang ilang pasunda­yag usa ka halad ngadto kang Señor Sto. Niño.

“Among giagwanta ang kainit, bahala’g unsay problema amo na lang sulbaron nga amoa kay wala na mi mahimo kay mao na man jud ang lugar,” matod sa handler.

Ang handler niingon nga mas gusto sila sa Abellana (Cebu City Sports Center) isip venue inay ang grounds sa South Road Properties tungod kay ang rota paingon sa grandstand dunay mga kahoy sa duha ka kilid nga makahatag og landong sa adlaw.

Matod pa sa handler nga dili kaayo organisado ang maong kalihukan, ug nidugang nga wala sila makakaon sa paniudto sa saktong oras tungod kay giingnan sila nga mopasundayag na sila apan hapit usa ka oras ang ilang paghulat.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph