Kalag sa usa ka batan-ong inahan nga gituohang gipatay niadtong hapon sa Dominggo, Disyembre 31, 2023 giingon nga nipakita sa iyang lola niadtong Enero 1, Bag-ong Tuig.
Niini, nagtuo si Aurora Arcilla nga ang kalag sa iyang anak nga si Angela, 18, wa mahimutang, nangita og hustisya, asoy sa inahan atol sa interbyo Superbalita Cebu sa Huwebes, Enero 4, 2024.
Ang mantalaan niduaw sa haya sa biktima sa bukiran sa Brgy. Sudlon 2, dakbayan sa Sugbo. Gibutyag ni Aurora nga ang iyang inahan, kun lola sa biktima, maoy gipakita ni Angela niadtong Enero 1 sa kadlawon.
“Kadlawon nakit-an ni Mama. Miagi duol sa bintana. Naghilak, nagpahid sa luha. Misulod sa balay, gibundak ang pultahan,” asoy ni Aurora. Nahitabo kini dihang namingaw ang palibot human sa buto-buto sa pagsugat sa Bag-ong Tuig.
Nagtuo sila nga wala mahimutang ang kalag sa iyang anak kay gawas sa pagpakita, nagsige kini og padamgo sa iyang mga pag-umangkon.
Si Aurora nanawagan sa kapulisan sa pagpalawom sa imbestigasyon aron mailhan ang killers sa iyang anak.
Tulo ka mga tawo ang ilang gituohang responsabli sa pagtuok hangtod namatay ang iyang anak.
Sa samang higayon, nituo sila nga walay kalambigitan si Jomart Monicar, kapuyo ni Angela, sa kamatayon sa iyang anak.
Si Jomart nisuway pagpakamatay niadtong Miyerkules sa alas 3 sa hapon, Enero 3, pinaagi sa paghikot og liston sa sapatos sa sulod sa lawak, apan nasalbar kay naputol ang liston.
Matod ni Jomart nga wa na niya maagwanta ang mga saway sa mga netizen kaniya nga siyay gipasanginlan sa kamatayon sa iyang kapuyo.
NAGDUDA
Si Riza Mae Arcilla, maguwang ni Angela, sa iyang Facebook post sayo ning semanaha, nagtuo nga gipatay ang iyang igsuon, wa maghikog, sumala sa pasiunang paghiling sa lawas niini sa kapulisan. “Gituok sa liog og pisi ug pinatalikod while nagpatotoy siya’s iyang anak. Ang iyang anak tawn nahug ug nabukol. Nya naa say mga garasgaras ang bata. Wa jud silay kaluoy,” matod ni Riza Mae sa iyang post.
Gawas niini, sa chat sa Superbalita Cebu niadtong Enero 2, di sila makatuo nga naghikog ang iyang igsuon kay way pisi o hikot nga nakaplagan.
Ang masuso lima pa ka buwan. “Daghan pa kaayo ni siya’g plano para’s iyang anak/pamilya pero inyo ra gipatay ug ingon ani, grabe ka brutal,” dugang sa maguwang.
Sa imbestigasyon sa kapulisan sa Police Precinct 13 ubos sa kamanduan sa ilang station chief nga si Police Major Marvin Fegarido, nadiskobrihan ni Jomart ang nahitabo sa iyang kapuyo mga alas 6:30 sa gabii.
Niasoy si Jomart nga nilakaw siya kuyog sa iyang igsuon nga babaye alas 5:20 sa hapon sa Disyembre 31 aron pagpalit og pan ug softdrink para sa pagsugat sa Bag-ong Tuig.
Apan pag-uli nila sa balay, ilang naabtan nga nagluhod ang biktima nga nakaduko ang ulo nga wa nay panimuot hinungdan nga nisinggit sila’g panabang.
Ang biktima gidala sa Cebu City Medical Center ug basi sa death certificate, ang hinungdan sa kamatayon “strangulation, alleged suicide.”/ DVG, GPL