Carmelo D. Lariosa
Panadtaran, San Fernando, Cebu
Wa ko gisubayng agianan
Apan dunay miatang nako sa dalan
Usa ka batang bulingit nagpangablit
Kay gigutom siya ning sayong
Kabuntagon.
Daghang dalan dinhi sa siyudad
Apan kinahanglan kang mosubay
Sa hustong agianan nga way moatang
Ug way mopakgang aron sa imong tumong
Mahiabot ka dayon.
Apan kining bata way klarong ugma
Dinhi sa siyudad nahimong laag nga isda.
Hain man diay ang iyang dagat?
Ako sama kaniya way dagat.
Gisubay ko kining dalan sa mga buta
Nga wala makakita ning anino sa bata
Nga giuhaw ug gigutom.
Karon gibuka ko ang akong mga mata
Ug gitunol ang tibuok singkuwenta pesos
Sa batang sa kagutom hapit na maugtos.