NGANO kaha?
Sa unang mga adlaw nakita siyang nagmug-ot
Ug dili gani moyanghag kon atong ikasugat
Apan karon tugob na sa pahiyom nga maham-ot
Mokidhat ug molamano– sayag nang mohimamat.
Ngano kaha?
Sa unang mga adlaw iya ang pagpalabilabi
Sa halangdon niyang landong way kabos makapasilong
Apan karon mohangop– maya nang moabiabi
Ug ganing di kaila agbayan pag pikpikon.
Ngano kaha?
Sa unang mga adlaw himaya niyang panglupig
Hangtod ang mga timawa iya ganing tikasan
Apan karon lahi na- pakig-angay nay gisablig
Malumo nag kasingkasing, mohatag nag panabang.
Ngano kaha?
Ah, ang adlaw sa piliay naghinandas na man ugod
Busa iyang gitanyag ang maayong kagawian.
Buot niyang lit-agon ang pagbati sa lungsod
Aron sa bugnong lugaynon mohugop niya paglaban.