WAY bukog ang kalisang nga modupa sa tutonlan
Kon mohanig ang kubol nga kabugnaw sa imong kalibutan
Ang pagbalingis mo lang sa hata sa katulugon
Mao ang hinungdan sa namangon nga kaugatan
Ning imong pagtaak sa agianan sa gabon sa kabungtoran.
Lahos sa paghayon sa imong mga bukton nga giabagan
Sa mga tiil kay wa may mga balhibo ka sa paglupad
Gamita ang gahom sa panahom uban sa mga tunob
Ayaw sandigi ang pagduda aron imong mahakgom
Ang naglabyog-labyog nga kamot sa kagabhion.
Dangawa ang dakong dag-om nga nimo nagtan-aw
Inigkahuman paminaw sa ilawom sa daghong sa mga ulan
Gisia ang tingog sa naglugok nilang kasub-anan
Kay kon makaipsot sila ayaw pasilong sa ilang anino
Hulata ang sangputanan sa lunop kay suyupon ra kini
Sa imong kasingkasing langoya lang ang sulog sa linaw
Maanod ra ka unya sa mga bulok sa moarkong bangaw
Sa taas di ka malumos sa mga balod sa kusog nga hangin.