Gagmayng tunob,
walay tingog, ni dyutayng
kagaskas madungog
sa ilang paggukod
sa nagkadaibulokong dan-ag,
nagsayawng kasikas sa siyudad,
nangumbitayng mga tinguha
nga daw mga hinog bunga
gitagana sa kabuntagon.
Apan hungaw nga kahayag
ang midan-ag sa pangandoy.
Ay! nasimang sa mga agianang
gibungbongag mga hunghong.
Ilang mga lakang nagbilin
og hilom nga mga lakrang
nag-uylap sa kagabhion, hanap
nga mga hulagway sa linghod
nga mga lapalapang namilit,
gidagpi sa bantok nga yuta.
Gihakop sa kangitngit
nagkipatkipat nga paglaom,
nanghuy-ab nga kahaw-ang
misapupo sa nagsusapinday
nga mga damgong nasalaag.