RONIE M. CATADMAN
Brgy. Maribago, Lapu-Lapu City, Cebu
May hustisya ba nga makita diha sa
Latagawng mga anino nga way hunong
Nga nakigbisog sa abugong disyerto
Nga gigamhan sa kahakog ug pagpanlupig?
May hustisya ba nga mobarog
Nga lintunganay nga makigharong
Sa igmat nga mga buaya sa katilingban
Nga naglimin ang suburno ug pangurakot?
May hustisya ba nga maangkon
Sa kalag nga nagbakho kay biktima sa lingla
Sa kadungganan
nahunlak nga gikuniskunis
Sa kuko sa limbong ug kahangol?
Kon ugaling may Anghel man sa hustisya
Nga mokunsad ning sulad sa mga kasakit
Pangindahay sa mga kalag nga naalaot
Silutan ang nakasala: Patas ug walay pagpinig!