PAGLABAY sa usa ka libo ka tuig,
Kining libro nga imong gigunitan mapulbos.
Ang iyang buko-buko nga karon tuskig
Ug binugkosan sa mga duga sa kahoy
Sa primero mabali ug dayon matun-as.
Imbis ang tingog sa pagpakli sa mga panid
Ang madungog mao ang mga dahon sa kawayanan
Nga gipalid-palid sa hangin.
Kon swertihon ko, ang mga titik nga tinta
Nga mangatagak motipon sa mga kudlit
Sa bato nga pagalantawon sa mga lumalabay
Nga moingon,
Kini padulong sa silangan, kana sa kasadpan.