LABING balaang buhat gayud
ang pagsakay og habalhabal.
gani, dihang gakumot na sa manubela
ang drayber, ikaw, sa tuong kamot,
gakumot sab sa rosaryohan,
samtang naggakos sa iyang hawak
ang imong wala, nangadye og unom
ka amahan namo, ug singkwenta
ka maghimaya ka maria aron giyahan
ang panaw ninyong duha.
Unang napulo ka maghimaya,
sa unang liko; ikaduhang napulo,
sa inyong pagkurbada; ikatulong napulo,
sa inyong pagsaka-kanaog; ikaupat
nga napulo. sa pagkabulasot ninyo
sa libaong; ug ang ikalima, dihang
mipaturagas na siya og padagan
paingon sa imong pinuy-anan.
Dihang nakaabot na sa danglog-danglog
nga dalan, nagkalawom sab ang imong
pangaliya, “Ginuo, dili lang unta mi
madisgrasya!”