Balak: Lingganay sa panahon

CARMELO D. LARIOSA

Panadtaran, San Fernando, Cebu


Nabati ko na sab ang bagting sa lingganay

Sa panahon ug di ko tuyuon nga mahandom

Ang puting baybayon nga saksi sa atong

Paglitok sa tam-is tang mga pulong:

‘Imo ako ug akoa ikaw!’ Nahimong kasugiran

Ug nahimong daganasan sa parat nga mga luha

Duyog ang pagdanguyngoy sa lapyahan.

Nagkakusog ang tulimbang sa kampana sa simbahan

Nga way pag-isip nga dunay masamdan nga pagbati

Gikan sa kasingkasing nga nawili sa halandumong

Panagtagbo nga namulak og wagas nga mga talidhay.

Ang imong katawa milagingling sa akong dunggan

Human ko mabati ang bagting sa multong lingganay.

Ang patayng hulma sa atong mg tunob sa lapyahan

Nabuhi pag-usab apan may mga tapya sa mga balod

Buot mopapas pag-usab sa nahulmang mga tunob.

Di ko sila tugtan samtang mabati ko pa ang bagting

Sa lingganay sa panahon sa akong pnumdoman.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph