Mar Mañus, Jr.
Basak-Iba, Lapu-Lapu City, Cebu
Sa imong pagdailos
sa akong mga aping
misubol ang akong tinguha
sa pagpanimalos
kay bayad sa imong pagbanaw
nga gitimba sa limbong.
himaya ko ang paghunos
sa kinabuhi sa binuhat
nga kanako nagpahilak.
Apan sa bakyawon ko na unta
ang akong mga kamot
aron manimalos
nakita ko ikaw nga didto usab
sa iyang mga mata naglarawan
sa hilabihang pagtapat ug pagbasol.
Ang dinilaab sa akong kasilag
napalong sa imong tinulo
ug gipadimdim ko kaniya
ang dugos sa pasaylo.
O, luha...pagka gamhanan mo!
Kon ikaw nay molugmaw
ang kasingkasing bantilison
tunawon sa kaluoy kay ikaw man
ang malig-ong taytayan
nga mosumpay sa nasiak
nga kalibutan sa mga pagbati
nga gitalikdan sa nangagiw
nga pagsinabtanay.