Balak: Mga linya nga gianod sa damgo

LEONEL QUILLO

San Fernando, Cebu

1.

Sa akong pagtukaw

Gilingaw-lingaw ang himi

Kong panahon kauban

Ang balak nga lintunganay

Sa akong kahiubos

Sa kalibutan.

2.

Duguon ang kalangitan

Dinuyogan sa ritmo sa

Lingganay sulod sa katedral

Nga gibitbit sa masupilong

Arkanghel ni Bandillo.

3.

Adunay peligrusong pangpang

Tinubdan sa samsara sa kahibulongang

Estante ug lalim nga natad sa abilidad

Sa galawayng kabaskog sa magbabalak

Kansang mga laray nalugpitan

Sa limitadong espasyo sa kawanangan

Sulod sa panaksan sa malamaton

Niyang panumdoman.