Ernesto D. Lariosa
San Fernando, Cebu
Gidawat ko paglugos ang paghunob sa Adlaw
Dihang mga pungpong sa iyang silaw miatbog
Minglapos sa akong sementong bungbong
Minglusot sa mga pultahag bentana
Nga gipanak-upan sa kahadlok:
Sa kasaysayan sa trahedya sa abog
Usa ka sugilanon sa gihakgom nga katol
Nga gipanabwag sa ilang mga kuko
Nangawras sa hapin sa among kalag!
Diin ang kaisog sa pagsukol giubo-ubo
Nag-udhak nga bugnawng pamasin lamang
Unta ang duhang gamot sa pamintaha
Malaya sa Ilawom sa yuta taliwa sa pagsibaw
Sa mangtas nga tingog sa makina nga namulong--
Misinggit sa umaabot nga katapusan
Paghagtos sa kinabuhi sa among lunhawng hangin.